ភ្នំពេញ៖ ពិព័រណ៍សៀវភៅ នឹងរៀបចំឡើងនៅថ្ងៃទី០៩-១១ ខែមីនា ឆ្នាំ២០២៤ ក្នុងបរិវេណវិទ្យាស្ថានបច្ចេកវិទ្យាកម្ពុជា ដើម្បីអបអរសាទរទិវាជាតិអំណានលើកទី៩។

ទិវាជាតិអំណាន តាមរយៈរៀបចំជាពិព័រណ៍សៀវភៅត្រូវបានប្រារព្ធជារៀងរាល់ឆ្នាំ ដោយពិព័រណ៍សៀវភៅ រៀបចំឡើងដោយក្រសួងអប់រំ យុវជន និងកីឡា ដែលសហការជាមួយភាគីពាក់ព័ន្ធក្នុងគោលបំណងពង្រឹងឡើងវិញនូវវប្បធម៌អាន ដើម្បីលើកកម្ពស់អក្សរសាស្ត្រ។

ក្នុងទិវាជាតិអំណាន ក្រសួងអប់រំ តែងរៀបចំកម្មវិធីប្រឡងប្រណាំង អានអត្ថបទ ស្មូតកំណាព្យ និងតែងនិពន្ធ ជ្រើសរើសជ័យលាភីថ្នាក់ជាតិចំណាត់ថ្នាក់លេខ១ ដល់លេខ៣ ពានរង្វាន់សម្ដេចតេជោ ហ៊ុន សែន ដោយឆ្នាំនេះធ្វើឡើង ក្រោមប្រធានបទ «អំណានជាមូលដ្ឋានគ្រឹះសម្រាប់ទាំងអស់គ្នាក្នុងជីវិត»។

ជាមួយគ្នានេះក្រសួងនឹងជ្រើសរើសបេក្ខជន បេក្ខនារី ជ័យលាភីចំនួន ៣រូប ដែលមានសមត្ថភាពខ្ពស់ក្នុងការបកស្រាយប្រធានបទ «តួនាទីព្រះពុទ្ធសាសនាក្នុងការលើកកម្ពស់សីលធម៌ និងចរិយាធម៌» ដើម្បីអបអរទិវាជាតិអំណាន លើកទី៩ ។ កាលបរិច្ឆេទផុតកំណត់ទទួលស្នាដៃ ៖ ថ្ងៃទី២០ ខែកុម្ភៈ ឆ្នាំ២០២៤ វេលាម៉ោង១៧:០០នាទី ទទួលស្នាដៃនៅនាយកដ្ឋានអភិវឌ្ឍកម្មវិធីសិក្សា។

ក្រសួងអប់រំអំពាវនាវសាធារណជនចូលរួមឱ្យបានកុះករ ដើម្បីជាចំណែកក្នុងការលើកស្ទួយដល់ការអាន និងតែងនិពន្ធសៀវភៅនៅកម្ពុជា និងដើម្បីចូលរួមលើកទឹកចិត្តដល់បេក្ខជនដែលមកពីទូទាំងប្រទេសក្នុងការប្រកួតប្រជែងផ្នែកអំណាន តែងនិពន្ធ សូត្រកំណាព្យ និងស្មូត្រ៕